Շաքարային դիաբետ տիպ 2

Շաքարային դիաբետը հիվանդություն է, որի ժամանակ առկա է արյան մեջ գլյուկոզայի բարձրացում: Ընդունած սննդի հետ գլյուկոզան անցնում է արյան մեջ, այնուհետև ինսուլին հորմոնի միջոցով այն տեղափոխվում է դեպի օրգանիզմի բջիջներ ` առաջացնելով էներգիա: Գլյուկոզան հանդիսանում է օրգանիզմի էներգիայի աղբյուր:

Շաքարային դիաբետ տիպ 2 առաջացման պատճառները`

1.Ինսուլինակայունություն, երբ օրգանիզմի բջիջները կայուն կամ անտարբեր են արտադրված ինսուլինի նկատմամբ, որի հետևանքով ինսուլինը լիարժեք չի կատարում իր ֆունկցիան , օրգանիզմում առաջացնելով էներգետիկ քաղց:

2.Երբ բջիջները քիչ են արտադրում ինսուլին

3.Գենետիկ նախատրամադրվածություն

4.Կյանքի որոկ /սխալ սննդակարգ, անբավարար ֆիզիկական ակտիվություն/:

Շաքարային դիաբետ 2 տիպը կարող է երկար ժամանակ չհայտնաբերվել, եթե չկան նրան հատուկ ախտանիշներ: Իմ պրակտիկայում շատ կան դեպքեր, երբ շաքարային դիաբետը հայտնաբերվում է պլանային հետազոտությունների ժամանակ, կամ , երբ բուժառուն հետազոտվում է այլ հիվանդության կապակցությամբ:Սակայն մեծ մասամբ այն հայտնաբերվում է կլինիկական ախտանիշների հիմքով:

Շաքարային դիաբետ 2 տիպ հիմնական ախտանիշները`

•Բերանում չորություն

•Հաճախամիզություն

•Գիշերամիզություն

•Ծարավի զգացում

•Թուլություն

•Հոգնածություն

•Տրամադրության անկում

•Քաշի տատանումներ

Շաքարային դիաբետ 2 տիպ բուժում

Բուժումը ներառում է մի քանի միջոցառումներ` արյան մեջ գլյուկոզայի մակարդակը կարգավորելու նպատակով:

1.Կյանքի որակի լավացում: Այն իր մեջ ներառում է ճիշտ սննդակարգ , ֆիզիկական ակտիվություն, ճարպակալում ունեցող բուժառուների քաշի նվազեցում:

2.Անհրաժեշտության դեպքում հակադիաբետիկ դեղամիջոցների կիրառում / հակադիաբետիկ հաբեր կամ ինսուլինոթերապիա/:

Յուրաքանչյուր բուժառուի նկատմամբ անհրաժեշտ է կիրառել անհատական մոտեցում:Օրինակ ճարպակալում ունեցող բուժառուներին անհրաժեշտ է քաշի իջեցում, ընդհուպ մինչև վիրահատական միջամտություն/ստամոքսի բարիատրիկ վիրահատություն/:

Չբուժված կամ վատ բուժված շաքարային դիաբետը կարող է վաղաժամ առաջացնել բարդություններ: Օրգանիզմի մանր և մեծ արյաունատար անոթների ախտահարման հետևանքով զարգանում է սիրտ- անոթային, երիկամային, ակնաբուժական հիվանդություններ: Արյան մեջ երկարատև բարձր գլյուկոզան բերում է նյարդերի ախտահարման: Այն դրսևորվում է վերին, ստորին վերջույթների ցավերով, թմրածությամբ, կամ երբեմն խոցերի առաջացմամբ / դիաբետիկ ոտնաթաթ/:

Ելնելով իմ պրակտիկայից կարող եմ նշել, որ շաքարային դիաբետ 2 տիպ ճիշտ բուժումը կանխարգելում է բարդությունների վաղաժամ զարգացումը; Շատ կարևոր է հակադիաբետիկ բուժման ճիշտ ընտրությունը, ճիշտ սննդակարգը, ֆիզիկական ակտիվությունը, ինչպես նաև ալկոհոլից և ծխախոտից խուսափելը:

Մինչ 2 տիպ շաքարային դիաբետի դրսևորումը առկա է մի վիճակ, որը կոչվում է նախադիաբետ: Այս փուլի հայտնաբերումը շատ կարևոր է, քանի որ անհրաժեշտ կանխարգելիչ միջոցառումների հետևանքով հնարավոր է երկարաձգել նախադիաբետից մինչև 2 տիպ շաքարային դիաբետ անցման ժամանակահատվածը:

Կանխարգելիչ միջոցառումներն են սննդակարգի, ֆիզիկական ակտիվության անհատական ընտրությունը, հաշվի առնելով յուրաքանչյուր բուժառուի առողջական խնդիրները:

Եթե ունեք նշված գանգատնեը, կամ ժառանգական նախատրամադրվածություն , ապա դիմեք ներզատաբանի խորհրդատվության :